Við erum ekkert sérstaklega glöð á Sólvangi að hafa selt glæsi stóðhestinn okkar hann Flögra frá Sólvangi.  Ólafur Ólafsson eigandi Samskipa var á ferðinni um suðurland um daginn með mági mínum honum Heimi  sem sér um eignaumsýslu fyrir Ólaf hér á landi.  Þeir renndu við í kaffi á Sólvangi.  Elsa var eitthvað að segja frá ræktuninni okkar og kom þá Flögri til tals.  Ólafur vildi endilega fá að sjá hestinn og hreifst svo af honum að hann keypti hann á staðnum.  Ólafur sagðist þurfa að launa vini sínum Al-Thani greiða sem hann ætti inni hjá honum og hugsaði Flögra sem gjöf til hans.

Al-Thani er Emírinn af Quatar og á eitt stærsta hrossaræktarbú í sameinuðu Arabísku furstadæmunum á „thoroughbred“ arabískum hestum.  Al-Thani á meðal annars hina frægu verðlaunahesta þá Tabarak og Sheridan sem höluðu inn tekjur á síðasta ári fyrir rúmlega 2 milljónir Evra.

Til að venja Flögra við hitan og rakann  í Quatar verður hann næsta mánuðinn í Hólaborg og verður þar í sérstöku prógrammi í hitalömpum og í nýja hitaklefanum sem er eins konar „hot Yoga“ fyrir hesta.

Ólafur hefur síðan boðið Siggu Pje að fylgja hestinum eftir og þjálfa hann fyrstu mánuðina í Quatar og kenna þjáfurum Emírsins öll undirstöðu atriði varðandi þjálfun íslenska hestsins og fylgja Flögra fyrstu sporin sín þar.

Við getum því miður ekki gefið upp verðið sem við fengum fyrir Flögra, en eitt er víst að nú getum við byggt nýja reiðskemmu á Sólvangi.

Hestafréttir hitti þær Sigríði Pjetursdóttur og Vilfríði Sæþórsdóttur en þær eru á fullu þessa dagana við tamningar og þjálfun á Sólvangi við Eyrarbakka. Þær stöllur harðbönnuðu blaðamanni hinsvegar að taka viðtalið uppá myndband, sögðust þurfa mun meiri fyrirvara fyrir myndatökur eins og sönnum drottningum sæmir.

En hvernig hefur sumarið annars gengið hjá ykkur hérna á Sólvangi?
 „Sumarið hefur gengið mjög vel, reyndar höfðum við ekki tíma til að gera allt sem við ætluðum, stefndum t.d. á fleiri hestaferðir og tíminn hljóp soldið frá okkur, en það er búið að ríða mikið út og sumarið gengið vel fyrir sig.  Ég er með stelpurnar mínar tvær, Elsu og Berthu en þær eru á öðru og þriðja ári og þurfa að sjálfsögðu sinn tíma.  Allavega sé ég fram á að gera „aupair“ ráðstafanir fyrir næsta sumar ef ég ætla að geta verið meira í hestunum“, segir Sigga og hlær.

Eruð þið með öflugt starfsfólk með ykkur í liði
„Hún Villa hefur verið hjá okkur í sumar með sína starfssemi en við þekkjumst vel, hún var að vinna hjá okkur síðasta haust og það er gott að hafa hana með okkur.  Síðan verðum við fimm stelpur í haust að temja og ríða út svo það verður mikið fjör, tvær norskar, önnur reyndar hálf íslensk, Helena dóttir Unn Kroghen og Alla Aðalsteinssonar.  Þannig að það verður mikið í gangi og skemmtilegur tími framundan.“ Segir Sigga og Villa bætir við að hún ætli að reyna að vera eins lengi á Sólvangi og hún komist upp með, enda skemmtilegt andrúmsloft og góður félagsskapur.

Og eruð þið með mikið að spennandi tryppum?
„Já já, mér finnst haustið vera frábær tími, við erum að temja mikið úr okkar ræktun og það er ótrúlega skemmtilegt að fylgjast með ræktuninni og almennt temja tryppin og gera þau reiðfær.“ Segir Sigga.  „Lesa í augað og spá og spekúlera í framtíð þessara hrossa, það er ótrúlega skemmtilegt“ bætir Villa við.

Haustútsölur í gangi
„Við ætlum síðan að opna búð hérna í haust en við höfum boðið uppá nokkurskonar haustútsölur síðustu haust.  Það þarf alltaf að fækka hrossunum á þessum tíma til að koma nýjum hrossum fyrir og þá reynum við að vera liðleg með verðin.  Síðan vorum við líka að spá í að vera með haustmót, og vera þá með hágmörk inná mótið en ekki lámörk svo við getum unnið einhverja titla í lok ársins“ segja þær og hlæja, og bæta við að þær stelpurnar ætli að koma gríðarlega sterkar inná næsta ári. 
 Og með þeim orðum kveðjum við þessar eldspræku stelpur sem eru greinilega jákvæðar fram í fingurgóma en þær taka hross í tamningu og þjálfun og bjóða uppá reiðnámskeið á Sólvangi.